ننګرهار؛ مومند درې ولسوالۍ کې د ٨٦ لوبډلو ترمنځ د ټېپ بال کرېکټ سیالۍ پای ته ورسېدې
د ننګرهار ولایت د بدني روزنې او ورزش ریاست اړوند د ټېپ بال کرېکټ فدراسیون د استازولۍ له لوري د ياد ولايت په مومند درې ولسوالۍ کې د ٨٦ لوبډلو ترمنځ د ټېپ بال کرېکټ سیالۍ د شمشاد ایګل لوبډلې په اتلولي پای ته ورسېدې.
د یادو سیالیو پایلوبه د شمشاد ایګل او هزار ناو سوپر سټار لوبډلو ترمنځ ترسره شوه. د لوبې پچه شمشاد ایګل لوبډلې وګټله او لومړی یې توپوهنه وکړه، چې په ټاکلو نهو اورونو کې یې د اوو ویکټو په زیان سره خپلې سیالې لوبډلې ته د ١٠٥ منډو هدف وټاکه. هزار ناو سوپر سټار د هدف په تعقیب کې د شپږو ویکټو په زیان سره ٩٣ منډې وکړې او د ١١ منډو په توپیر یې لوبه وبایلله.
دا سیالۍ د نظام د ملاتړ په موخه ترسره شوې، چې دوې میاشتې یې دوام وکړ او په پای کې اتلې لوبډلې ته یو عراده موټرسایکل او لس زره افغانۍ او دویم مقام لوبډلې ته یو عراده بایسکل او پنځه زره افغانۍ ورکړل شوې.
