ننګرهار؛ د ورزش ادارې د رهبرۍ له لوري خراسان پوهنتون کې کلنۍ سپورټي مېله پرانیستل شوه
د ننګرهار ولایت د بدني روزنې او ورزش ریاست په همغږۍ او د هیواد د ورزش ادارې د رهبرۍ له لوري د یاد ولایت په خراسان پوهنتون کې د کلنۍ مېلې سپورټي اوونۍ پرانیسته وشوه.
په دې سپورټي مېله کې له همڅنګو ولایتونو او ولسوالیو څخه د والیبال، کرکټ، تکواندادو، فوټبال او جمناسټیک بېلابېلو مخکښو لوبډلو او لوبغاړو ګډون کړی وو، چې نندارې ته یې د ورزش ګڼ مینه وال، مشران او عام وګړي راټول شوي وو.
د المپيک ملي کمېټې او سپورټ عمومي رئيس مولوي احمدالله وثيق د دې برنامې پر پیل خوښي وښوده او په خپلو خبرو کې يې ځوانان ورزش ته وهڅول او د روغ تن لپاره یې د ورزش پر پاللو ټینګار وکړ.
نوموړي همدارنګه یادونه وکړه، چې اوس تر بل هر وخت ورزش ته ډېره پاملرنه شوې ده او هڅه کوي څو په ټول هېواد کې د ورزش په بېلابېلو برخو اړین پرمختګونه رامنځته کړي.
د یادونې وړ ده چې د دې برنامې په پای کې په ګرمو غوړیو مخ او لاسونه مینځل، په سر چارمغز ماتول، ښېښې خوړل او نور هېښوونکي نمایشونه هم ترسره شول.
