ننګرهار؛ د بهسودو ولسوالۍ د ټيپ بال سياليو چمپينز ټراپي مبارز ځوانانو لوبډلې وګټله
د ننګرهار ولايت د ورزش رياست په همکارۍ د ټېپ بال فدراسیون له لوري د ځوانانو د تشویق او له نشه يي توکو څخه د راګرځولو په موخه، د بهسودو ولسوالۍ په کچه د لس لوبډلو ترمنځ د کرکټ ټېپ بال سيالۍ، چې دوه ورځې وړاندې پيل شوې وې، د مبارز ځوانانو لوبډلې په ګټه پاى ته ورسېدې.
د دغو سياليو فاينل ته د مبارز ځوانانو خوځښت او بهسود سوپر پاور لوبډلو لار وموندله، چې د بهسود سوپر پاور لوبډلې د لوبې پچه وګټله او لومړى يې د توپوهنه وکړه، چې په ټاکلو اته اورونو کې يې ٦٨ منډې وکړې.
په مقابل کې د مبارز ځوانانو لوبډلې وکړل شوى هدف د يوه لوبغاړي په سوځېدو سره د لوبې په اووم اور کې پوره کړي او لوبه يې وګټله.
ابرار الله د دې سياليو د غوره لوبغاړي جایزه ترلاسه کړه چي په پنځو لوبو کې يې د خپلې لوبډلې لپاره ١٩٣ منډي وکړې.
په پاى کې د ننګرهار ورزش ریاست له لوري ګټونکي لوبډلې ته کپونه هم ورکړل شوه.
