ننګرهار؛ دور بابا ولسوالۍ کې د ١٢ لوبډلو ترمنځ د ټېپ بال کرېکټ سیالۍ پای ته ورسېدې
\د ننګرهار ولایت د بدني روزنې او ورزش ریاست اړوند د ټېپ بال کرېکټ فدراسیون د استازولۍ له لوري د ياد ولايت په دور بابا ولسوالۍ کې د ١٢ لوبډلو ترمنځ د ټېپ بال کرېکټ سیالۍ د اظهار مومند لوبډلې په اتلولي پای ته ورسېدې.
د یادو سیالیو پایلوبه د تور لالا او اظهار مومند لوبډلو ترمنځ ترسره شوه. د لوبې پچه اظهار مومند لوبډلې وګټله او لومړی یې توپ وهنه وکړه، چې په ټاکلو لسو اورونو کې یې د اوو ویکټو په زیان خپلې سیالې لوبډلې ته د ١٣٢ منډو هدف وټاکه. تور لالا لوبډلې د هدف به تعقیب کې د نهو ویکټو په زیان د سل منډې وکړې او د ٣١ منډو په توپیر یې لوبه وبایلله.
دا سیالۍ د ځوانانو ترمنځ د یووالي په موخه ترسره شوې، چې لس ورځې یې دوام وکړ.
