ننګرهار؛ خوږیاڼو ولسوالۍ کې د اتلسو لوبډلو ترمنځ د ټېپ بال کرکټ سیالۍ پیل شوې
د ننګرهار ولایت د بدنې روزنې او ورزش ریاست په لارښوونه او همغږۍ د نظام د ملاتړ او ورستیو لاسته راوړنو په موخه د خوږیاڼو ولسوالۍ په قیلغو سیمه کې د ۱۸ لوبډلو ترمنځ د ټېپ بال کرکټ سیالۍ پیل شوې.
د یادو سیالیو په لومړۍ لوبه کې ننګرهار اذرخش لوبډلې د پچې په ګټلو سره لومړی توپوهنه وکړه او په ټاکلو لسو اورونو کې يې د پنځو لوبغاړو په سوځېدو سره سیالې لوبډلې ته د ۱۰۷ منډو هدف وټاکه، خو قیلغو لوبډله د یاد هدف په پوره کولو کې پاتې راغله او د ټولو لوبغاړو په سوځېدو سره يې ۷۳ منډې جوړې کړې، چې د ۳۰ منډو په توپیر يې ماتې وخوړه.
د یادو سیالیو نندارې ته د خوږیاڼو ولسوالۍ قومي مشران، ځوانان، ورزشکاران او د کرکټ د لوبې ګڼ مینهوال ورغلي وو.
دا سیالۍ، چې ۲۰ ورځې به دام وکړي، بله لوبه به يې د چمتلې او د سپین ځایو د کرکټ لوبډلو ترمنځ ترسره وشي.
