میدان وردګ؛ په لومړۍ حصه بهسود ولسوالۍ کې فرهنګي، علمي او ورزشي مېله تر سره شوه
د میدان وردګ ولایت د ورزش آمریت او د اطلاعاتو او فرهنګ ریاست له لوري په لومړۍ حصه بهسود ولسوالۍ کې د قومونو، ولسونو او ځوانانو ترمنځ د یوالي او فرهنګي دودونو د ژوندي ساتلو په موخه فرهنګي او ورزشي مېله ترسره شوه.
په دغه مېله کې د میدان وردګ د ملکي او نظامي ادارو په مسؤلینو سربېره د هزاره او کوچیانو د قومونو مشرانو او په سلګونو نندارچیانو ګډون کړی وو، چې یو ځينې ورزشي نندارې لکه جمناستیک، وزلوبه، تکواندو، پهلواني او ورته وخت کې د کتابونه، لاسي صنایع او د هېواد د تاریخي ځایونو انځورونه نندارې ته وړاندې او د رواشو دودیزه مېله هم پرانیستل شوه.
د میدان وردګ ولایت والي قاري بختیار معاذ دې ته ورته فرهنګي، عملي او ورزشي میلې د ولسونو، قومونو او ځوانانو ترمنځ د یووالي او ورورولۍ په برخه کې خورا اړینې او مهمې وګڼلې، له ولسونو یې وغوښتل چې د قومونو ترمنځ یووالی وساتي او هیچا ته اجازه ورنګړي، چې د قومونو ترمنځ ستونزې او شخړې رامنځته کړي، له دوی څخه یې هیله وکړه د خپلو سیمو د امنیت د تامین، ټولنیز نظم ساتلو او د ولسونو ترمنځ د یووالي په برخه د ا.ا.ا سره همېشه همکار پاتې شي.
د یادونې وړ ده چې تېر کال هم په لومړۍ حصه بهسود ولسوالۍ کې دا ډول فرهنګي، علمي او ورزشي میله ترسره شوه چې سلګونه کسانو پکې ګډون کړی وو.
