میدان وردګ؛ مرکز کې د لسو دولتي ادارو تر منځ د والیبال سیالۍ پای ته ورسېدې

د میدان وردګ ولايت د بدني روزنې او ورزش آمریت اړوند د والیبال فدراسیون د استازولي له لوري د یاد ولایت مرکز میدان ښار کې د لسو دولتي ادارو ترمنځ د والیبال سیالۍ پای ته ورسېدې.

د يادو سياليو پايلوبه د بدني روزنې او ورزش آمریت او ترافیکو مدیریت لوبډلو تر منځ ترسره شوه، چې په پایله کې د بدني روزنې او ورزش آمریت لوبډلې د درې پر یو میدانونو په توپیر خپلې سیالې لوبډلې ته ماتې ورکړه او اتلولي یې په خپل نوم کړه.

دغه سیالۍ د میدان وردګ ولایت د دولتي ادارو ترمنځ د همغږي د زیاتېدو او والیبال لوبې ته د ودې په موخه ترسره شوې، چې دوې اوونۍ یې دوام وکړ او په پای کې لومړي، دویم او درېیم مقام لوبډلو ته نغدي ډالۍ او ستاینلیکونه ورکړل شول.