میدان وردګ؛ سیداباد ولسوالۍ کې د ۶۲ لوبډلو ترمنځ د ټېپ بال کرېکټ سیالۍ پای ته ورسېدې
د میدان وردګ ولایت د بدني روزنې او ورزش امریت اړوند د ټېپ بال کرېکټ فدراسیون د استازولۍ له لوري د ياد ولايت په سیدآباد ولسوالۍ د هفت اسیا سیمه کې د ۶۲ لوبډلو ترمنځ د ټېپ بال کرېکټ سیالۍ د شش قلعه سوپر ځواک لوبډلې په اتلولۍ پای ته ورسېدې.
د یادو سیالیو پایلوبه د شش قلعه سوپر ځواک او اسحاق خېلو لوبډلو ترمنځ ترسره شوه. د اسحاق خېلو لوبډلې د پچې په ګټلو سره د توپ وهنې پرېکړه وکړه، چې په ټاکلو اتو اورونو کې د شپږو لوبغاړو په سوځېدو سره مقابلې لوبډلې ته د ۱۴۴ منډو هدف وټاکه. په ځواب کې د شش قلعه سوپر ځواک لوبډلې ټاکل شوی هدف د لوبې په اووم اور کې د څلورو لوبغاړو په سوځېدو سره پوره کړ او د شپږو ويکټو په توپير يې لوبه وګټله.
د يادو سياليو موخه ورزش ته د ځوانانو هڅول او د تفريح برابرول و، چې يوه اوونۍ يې دوام وکړ.
