ميدان وردگ؛ په چک ولسوالۍ کې د اتو لوبډلو ترمنځ د ټېپ بال کرکټ سيالۍ پای ته ورسېدې
د ميدان وردگ ولايت د بدني روزنې او ورزش آمريت اړوند د ټېپ بال کرکټ فدراسيون د استازولۍ له لوري د چک ولسوالۍ په چک بند تفريحي لوبغالي کې د اتو لوبډلو ترمنځ د ځوانانو د فکري رغوونې په موخه د ټېپ بال کرکټ سيالۍ، چې يوه اوونۍ مخکې پيل شوې وې، د شينز اتلانو لوبډلې په اتلولۍ پای ته ورسېدې.
د يادو سياليو پايلوبه د شنیز اتلانو او سيدآباد اتلانو لوبډلو ترمنځ ترسره شوه، چې شنيز اتلانو لوبډلې د لوبې پچې په گټلو سره په ټاکلو لسو اورونو کې د څلورو لوبغاړو په سوځېدو سره سیالې لوبډلې ته د ۱۴۶ منډو هدف وټاکه، په مقابل کې سيدآباد اتلانو لوبډلې يواځې ۱۱۰ منډې وکړې او لوبه يې د ۳۶ منډو په توپير وبايلله.
ياده دې وي، چې د دغو سياليو په پای کې لومړي او دويم مقام گټوونکو لوبډلو ته کپونه او نغدي ډالۍ ورکړل شوې.
