ميدان وردگ؛ جلرېز ولسوالۍ کې د ۱۵ ورزشکارانو ترمنځ د غشو ويشتلو سيالۍ ترسره شوې
د ميدان وردگ ولايت د بدني روزنې او سپورټ امريت اړوند د ملي او دوديزو لوبو مديريت له لوري د جلرېز ولسوالۍ په سر چشمه دره کې د ۱۵ ورزشکارانو ترمنځ د غشو ويشتلو دوستانه سيالۍ ترسره شوې.
د دغو سياليو د ترسره کېدو موخه ملي او دوديزو لوبو ته وده ورکول او له نشه يي توکو څخه د ځوانانو لرې والی ښودل شوی وو، چې يوه ورځ يې دوام وکړ.
د يادو سياليو په پای کې د ياد ولايت د سپورټي امريت له لوري غوره ورزشکارانو ته ستاينليکونه ورکړل شول.
