ميدان وردگ؛ تگاب راموز لوبډلې د فوټبال خزاني سياليو اتلولي وگټله
د ميدان وردگ ولايت د بدني روزنې او ورزش امريت اړوند د فوټبال ملي فدراسیون د استازولي له لوري د ياد ولايت په بهسودو ولسوالۍ کې د ۱۶ لوبډلو ترمنځ ورزش ته د ودې ورکولو او سالمې تفريح برابرولو په موخه د فوټبال خزاني سيالۍ د تگاب راموز لوبډلې په اتلولۍ پای ته ورسېدې.
د يادو سياليو په پايلوبه کې تگاب راموز لوبډلې خپلې سيالې دامن راموز لوبډلې ته د ۵ پر ۲ گولونو په توپير ماتې ورکړه او اتلولي يې په خپل نوم کړه.
د يادولو وړ ده، چې دغو سياليو لس ورځې دوام وکړ او په پای کې اتلې لوبډلې ته د اتلولۍ جام او غوره لوبغاړو ته بېلابېلې چمتو شوې ډالۍ ورکړل شوې.
