لوگر کې د ۳۲ لوبډلو ترمنځ د فوټبال سيالۍ د شاهين برکي برک لوبډلې په اتلولۍ پای ته ورسېدې
د لوگر ولايت د بدني روزنې او ورزش امريت او د فوټبال ملي فدراسیون په گډه همکارۍ او د OCHR مؤسسې په مالي ملاتړ د پل علم ښار په مرکزي فوټبال سټډيوم کې د ۳۲ لوبډلو ترمنځ د فوټبال سيالۍ، چې دوه نيمې مياشتې مخکې پيل شوې وې د شاهين برکي برک لوبډلې په اتلولۍ پای ته ورسېدې.
د دغو سياليو د پای په مراسمو کې د هېواد د ورزش ادارې عمومي رييس مولوي احمد الله وثيق، د دې ادارې فني او مسلکي مرستیال حافظ احمد جان ځدراڼ، د فوټبال فدراسيون رييس محمد یوسف کارگر، د لوگر ولايت د ورزش آمر انجينر مزمل نعيم زي، ورزشکارانو او د ورزش گڼ شمېر مينوالو گډون کړی وو.
د يادو سياليو پايلوبه د شاهين برکي برک او طوفان لوبډلو ترمنځ ترسره شوه، چې په ټاکلي وخت سيالۍ ۰/۰ مساوي پای ته ورسېده، خو په پنالټيانو کې شاهين برکي برک لوبډلې خپلې سيالې لوبډلې ته د ۴ پر ۲ گولونو په توپير ماتې ورکړه او اتلولي يې په خپل نوم کړه.
د يادولو وړ ده، چې د دغو سياليو په پای کې د لوگر ولايت د ورزش آمريت له لوري لومړي او دويم مقام گټونکو لوبډلو ته کپونه، مډالونه، ستاينليکونه او د يادې موسسې مسؤلينو له خوا لوبډلو ته ورزشي وسايل ورکړل شول.
