لوګر؛ د یو نیم میلیون افغانيو په ارزښت د ورزشي اماکنو رغنیزې چارې پیل شوې
د OCHR مؤسسې د استازو له لوري د لوګر ولایت د بدني روزنې او ورزش په آمریت امریت کې د یو نیم میلیون افغانیو په ارزښت د ورزشي اماکنو رغنیزې چارې پیل شوې.
د OCHR مؤسسې د مسؤولانو په خبره په دغې پروژه کې د ٣٦ مترو په اوږدوالي د ياد ولايت د ورزشي آمريت د احاطې دېوال، د ياد ولايت د فوټبال د لوبغالي د ځينو برخو بیا رغونه، د لوبغاړو د لیلیې د ودانۍ د ځینو برخو بیا رغونه او د ورزش آمریت په انګړ کې د ١٢٠ متره ژورې څاه کېندل شامل دي.
د یادې پروژې د پرانیستې په مراسمو کې د المپیک کمېټې، بدني روزنې او ورزش لوی رئیس مولوي احمدالله وثیق، د ياد رياست تخنیکي او مسلکي مرستیال حافظ احمدجان ځدراڼ، د المپیکي چارو رئیس داد محمد پاینده اختري، د لوګر ولایت ورزشي آمر مزمل نعیمزوی او د OCHR مؤسسې استازو ګډون کړی و، چې د هېواد د ورزش ادارې له لوري یې د بنسټ ډبره کېښودل شوه.
