لغمان کې د ۷۶ لوبډلو ترمنځ د والیبال سیالۍ پای ته ورسېدې
د لغمان ولایت د بدني روزنې او ورزش آمریت له لوري د یاد ولایت مرکز مهترلام ښار کې د ۷۶ لوبډلو ترمنځ د والیبال سیالۍ د لغمان ځوانانو لوبډلې په اتلولي پای ته ورسېدې.
د یادو سیالیو پایلوبه کې لغمان ځوانانو لوبډلې د ۳ پر ۲ میدانونو په توپیر خپلې سیالې قلعه خان ځوانانو لوبډلې ته ماتې ورکړه او اتلولي یې وګټله.
دا سیالۍ د لغمان ولایت د والیبال ټاکنیزې لوبډلې ته د غوره لوبغاړو موندلو په موخه ترسره شوې، چې ۲۰ ورځې یې دوام وکړ.
