لغمان کې د اتو ولایتونو ترمنځ د پهلوانۍ شپږم پړاو سيالۍ پای ته ورسېدې
د المپیک، بدني روزنې او ورزش عمومي ریاست اړوند د پهلوانۍ ملي فدراسیون له لوري د لغمان ولايت په مرکزي جمنازيوم کې د هېواد له اتو ولایتونو د ۵۸۰ پهلوانانو ترمنځ د پهلوانۍ شپږم پړاو چلينجي سيالۍ، چې دوې ورځې يې دوام وکړ پای ته ورسېدې.
په يادو سياليو کې له کابل، ننګرهار، باميان، پروان، کاپيسا، لوګر، پکتيا او کوربه لغمان ولايت څخه ۵۸۰ پهلوانانو په بېلابېلو وزني کټگوريو کې گډون کړی وو، چې په پايله کې يې لغمان لومړی، کابل دويم او ننګرهار بيا درېيم مقام خپل کړ.
د ويلو ده، چې د دغو سياليو موخه د پهلوانانو ترمنځ سالم رقابت او د ورزش وده وه، چې په پای کې غوره پهلوانانو ته کپوته، مډالونه او د اتلولۍ حکمونه ورکړل شول.
