لغمان؛ په اليشنگ ولسوالۍ کې د ۱۶ لوبډلو ترمنځ د ټېپ بال کرکټ سيالۍ پای ته ورسېدې
لغمان ولايت د بدني روزنې او ورزش آمريت اړوند د ټېپ بال کرکټ فدراسيون د استازولۍ له لوري د اليشنگ ولسوالۍ په ش.ه.ي.دانو کلي کې د ۱۶ لوبډلو ترمنځ ورزش ته د ځوانانو هڅولو او سالمې تفريح په موخه د ټېپ بال کرکټ سيالۍ، چې دوې اوونۍ مخکې پيل شوې وې، د خواجه صاحب لوبډلې په اتلولۍ پای ته ورسېدې.
د يادو سياليو پايلوبه د خواجه صاحب او اطفايې لوبډلو ترمنځ ترسره شوه، چې خواجه صاحب لوبډلې د لوبې پچې په گټلو سره په ټاکلو لسو اورونو کې سيالې لوبډلې ته د ۱۶۱ منډو هدف وټاکه، په مقابل کې اطفايې لوبډلې ۱۵۷ منډې وکړې او لوبه يې د څلورو منډو په توپير وبايلله.
ياده دې وي، چې د دغو سياليو په پای کې د ياد ولايت د ورزش آمريت له لوري لومړي او دويم مقام گټوونکو لوبډلو ته کپونه، مډالونه، او ستاينليکونه ورکړل شول.
