لغمان؛ مرکز مهترلام ښار کې د ۵۰ لوبډلو ترمنځ د ټېپ بال کرکټ سيالۍ پای ته ورسېدې
د لغمان ولايت د بدني روزنې او سپورټ امريت اړوند د ټېپ بال کرکټ فدراسيون د استازولۍ له لوري د قلعه سراج بڼ په ورزشي لوبغالي کې د ۵۰ لوبډلو ترمنځ د ټېپ بال کرکټ سوپر ۶ سيالۍ د شارجه منتخب لوبډلې په اتلولۍ پای ته ورسېدې.
د يادو سياليو پايلوبه د شارجه منتخب او پردېس لوبډلو ترمنځ ترسره شوه، چې په پايله کې شارجه منتخب لوبډلې په ټاکلو شپږو اورونو کې د يو لوبغاړي په سوځېدو سره خپلې سيالې لوبډلې ته د ۱۰۵ منډو هدف کېښود، پردېس لوبډلې ياد هدف تر لاسه نه کړ او ۳۰ منډو په توپير يې ماته ومنله.
دغه سيالۍ، چې شاوخوا يوه مياشت يې دوام وکړ، موخه يې د ځوانانو ترمنځ د سالمې تفريح برابرول و او په پای کې د ورزش امريت له لوري گټونکې لوبډلې ته د اتلولۍ جام او غوره لوبغاړو ته کپونه، مډالونه او ستاينليکونه ورکړل شول.
