لغمان؛ قرغيو ولسوالۍ کې د پنځو لوبډلو ترمنځ د ټېپ بال کرېکټ سيالۍ پای ته ورسېدې
د لغمان ولايت د بدني روزنې او ورزش آمريت اړوند د ټېپ بال کرېکټ فدراسيون د استازولۍ له لوري د ياد ولايت په قرغیو ولسوالۍ کې د پنځو لوبډلو ترمنځ د ټېپ بال کرېکټ سيالۍ د فيروزآباد ځوانانو لوبډلې په اتلولۍ پای ته ورسېدې.
د يادو سياليو پايلوبه د فيروزآباد ځوانانو او ميرا قلعه لوبډلو ترمنځ ترسره شوه، د لوبې پچه فيروزآباد ځوانانو لوبډلې وگټله او لومړی یې د توپ وهنې پرېکړه وکړه، چې په نهو اورونو کې يې د پنځو لوبغاړو په سوځېدو سره خپلې سيالې لوبډلې ته د ۱۵۲ منډو هدف وټاکه. میرا قلعه لوبډلې د هدف په تعقیب کې د ټولو اورونو په لوبولو سره ۱۰۰ منډې وکړې او لوبه يې د ۵۲ منډو په توپير وبايلله.
د ويلو وړ ده، چې دغو سياليو شاوخوا ۲۱ ورځې دوام وکړ او په پای کې لومړي او دويم مقام گټونکو لوبډلو ته چمتو شوې ډالۍ ورکړل شوې.
