لغمان؛ قرغه يو ولسوالۍ کې د واليبال سيالۍ د آغراباد لوبډلې په اتلولۍ پای ته ورسېدې
د لغمان ولايت د بدني روزنې او سپورټ آمريت له خوا، د واليبال فدراسيون په لارښوونې او د عبدالرحيمزيو ځوانانو په مالي همکارۍ د ۱۸ لوبډلو تر منځ د واليبال سيالۍ، وړمه ورځ پای ته ورسېدې.
د سياليو پايلوبه د آغراباد او عبدالرحيمزيو لوبډلو تر منځ ترسره شوه، چې د ۳/۰ ميدانونو په توپير د اغراباد لوبډلې په بريا پای ته ورسېده، چې په پای کې د لومړي او دويم مقام ګټونکو لوبډلو ته کپونه، ستاينليکونه او مډالونه ورکړل شول.
د يادونې وړ ده، چې د يادو سياليو موخه له نظام څخه ملاتړ او د ځوانانو يووالی ښودل شوی و، چې ۱۰ ورځې يې دوام وکړو.
