لغمان؛ عليشنګ ولسوالۍ کې د ۷۴ لوبډلو ترمنځ د ټېب کرکټ سیالۍ پای ته ورسېدې
د لغمان ولايت د بدني روزنې او ورزش آمريت اړوند د ټېب بال فدراسيون د استازولۍ له لوري د ۷۴ لوبډلو ترمنځ د ټېپ بال کریکټ سيالۍ، چې ۴۸ ورځې وړاندې د یاد ولایت عليشنګ ولسوالۍ د کوټالۍ کلي په ورزشي لوبغالي کې پيل شوې وې د کچاړي لوبډلې په اتلولۍ پای ته ورسېدې.
د دغو سیالیو پایلوبه د کچاړي او کوټالۍ لوبډلو ترمنځ ترسره شوه، چې د کچاړي لوبډلې په ټاکلو ۱۰ اورونو کې د شپږو لوبغاړو دلاسه ورکولو سره د ۲۰۵ منډو هدف وټاکه په مقابل کې د کوټالۍ لوبډلې د ټولو لوبغاړو دلاسه ورکولو سره یواځې ۱۵۶ منډې ترلاسه کړې او سیالي یې د ۴۸ منډو په توپیر کچاړي لوبډلې ته وبایلله.
د يادو سياليو موخه د ټېپ بال کرکټ ورزش ته وده ورکول او د ځوانانو لپاره یوه سالمه تفریح برابرول و.
د سیالیو په پای کې د لغمان ورزش امریت له لوري لومړي او دویم مقام لوبډلو ته کپونه او غوره لوبغاړو ته چمتو شوي مډالونه او ستاینلیکونه ورکړل شول.
