لغمان؛ د سرخکانو غونډي کلي رمضان جام ټېپ بال کرکټ سیالۍ د لالو لوبډلې په اتلولي پای ته ورسېدې
د لغمان ولایت د بدني روزنې او ورزش آمریت او د ټېپ بال کرکټ فدراسیون د استازولۍ له لوري د یاد ولایت د سرخکانو غونډي کلي کې د ۳۶ لوبډلو ترمنځ د رمضان جام په نوم د ټېپ بال کرکټ سیالۍ د لالو لوبډلې په اتلولي پای ته ورسېدې.
د یادو سیالیو پایلوبه د غونډي کلي او لالو لوبډلو ترمنځ ترسره شوه، چې لالو لوبډلې د پچې په ګټلو سره په ټاکلو لسو اورونو کې د دوه لوبغاړو په زیان سره مقابلې لوبډلې ته د ۱۴۳ منډو هدف وټاکه؛ خو د غونډي کلي لوبډلې و نه شو کولی چې یاد هدف ته ځان ورسوي او لوبه یې لالو لوبډلې ته وبایلله.
دغه سیالۍ چې ځوانانو ته د تفرېح د برابرولو په موخه پیل شوې وې، په پای کې لومړي او دویم مقام ګټونکو لوبډلو ته کپونه، مډالونه او ستاینلیکونه ورکړل شول.
