لغمان؛ د ولسواليو ترمنځ د ټېپ بال کرکټ سيالۍ پای ته ورسېدې
د لغمان ولايت د بدني روزنې او ورزش امريت له لوري د مرکز او ولسواليو په کچه د ۱۲ لوبډلو ترمنځ د ټېپ بال کرکټ سيالۍ د اصف اکرمزي لوبډلې په ګټه پای ته ورسېدې.
د دغو سياليو پايلوبه د الينګار منتخبې او مرکز اصف اکرزمي لوبډلو ترمنځ ترسره شوه، لومړی توپوهنه الينګار لوبډلې وکړه او په ټاکلو لسو اورونو کې يې سيالې لوبډلې ته ۱۰۲ منډې هدف کېښود، بل لوري ته اکرمزي لوبډلې ياد هدف د لوبې په اتم اور کې پوره کړه او په پنځو ويکټو يې اتلولي خپله کړه.
هېره دې نه وي، چې يادې سيالۍ د زاهدالله ريکازي په مالي ملاتړ ترسره شوې او په پای کې د نوموړي ولايت د ورزشي امريت د مسوولينو له لوري غوره لوبډلو او لوبغاړو ته کپونه او ستاينليکونه ورکړل شول.
