فوټبال؛ د افغانستان چمپینز لیګ اتلان وستایل شول
هغه مراسم چې په همدې موخه د کندهار ولايت په احمدشاهي ورزشي لوبغالي کې جوړ شوي وو، د دغو سياليو ګټونکو لوبډلو ته د بدني روزنې او ورزش د عمومي رييس له خوا کپونه او ډالۍ ورکړل شوې.
د المپيک د ملي کمېټې او ورزش رئيس انجنير نظرمحمد مطمئن د يادو مراسمو له تنظيموونکو مننه وکړه او زياته يې کړه: د خوښۍ ځای دی چې نن په کندهار کې په بشپړه سوله ييزه فضا کې يو او د هرات د اتلانو ستاينه کوو.
هغه وویل، «د خدای ج شکر دی چې په افغانستان کې سرتاسري سوله ده او خلک کولای شي په سوله کې خپل ژوند پرمخ بوځي.
د يادونې وړ ده، چې دغه ليګ يوه مياشت وړاندې په کندهار کې د افغانستان له زونونو څخه د ١٢ لوبډلو په ګډون پيل شوى و، چې د هرات سرخ پوشان لوبډلې د ٢٧ نمرو په ترلاسه کولو سره د دې سياليو اتلولي خپله کړه او د کابل استقلال لوبډله د ٢٦ نمرو په لرلو سره دويم مقام خپل کړ.
