فرينډ FC لوبډلې هلمند کې د فوټسال سياليو لومړي پړاو اتلولي وګټله
هلمند کې د ۳۲ لوبډلو ترمنځ د فوټسال لومړی پړاو سيالۍ چې څه موده وړاندې د یاد ولایت د بدني روزنې او فوټبال فدراسیون له خوا پیل شوې وې د فرينډ FC لوبډلې په اتلولۍ پای ته ورسېدې.
پايلوبه د " فرينډ او خاکسار يارانو" لوبډلو ترمنځ وشوه چې د " ۱۴ - ۳ " پایلې سره د فرینډ په اتلولۍ او د خاکسار يارانو لوبډلې په دویم مقام تمامه شوه.
د ټورنمنټ غوره لوبغاړی وحيد الله حکيمي، اميد احمد ساحل غوره ګول وهونکی او بسم الله الهام غوره ګول ساتونکی اعلان شول.
د دې سياليو د غوره روزونکي جايزه د فرينډ FC روزونکي عبدالواسع داوري ته ورکړل شوه.
دا لومړی ځل وو چې هلمند ولایت کې د ۳۲ لوبډلو ترمنځ د فوټسال سیالۍ ترسره کيږي، تر دې وروسته به د فوټسال غوره ليګ سيالۍ پیل شي.
د پايلوبي په مراسمو کې د ورزشي مسوولینو ترڅنګ د لښکرګاه ښاروالۍ مرستيال حاجي نيک محمد امتي، یو شمېر نورو چارواکو او ګڼو مینوالو ګډون درلود.
د پای مراسمو کې ګټونکې لوبډلې ته کپ او غوره لوبغاړو ته مډالونه، ستاینلیکونه او نورې ډالۍ ورکړل شوې.
