غور؛ په پسابند ولسوالۍ کې د والیبال سیالۍ د عقابان لوبډلې په اتلولۍ پای ته ورسېدې
د غور ولایت بدني روزنې او ورزش امریت او د دې ولايت د والیبال فدراسیون د استازولۍ په مرسته د اتو لوبډلو ترمنځ د والیبال سیالۍ، چې ۱۵ ورځې مخکې په پسابند ولسوالۍ کې پیل شوې وې د عقابان لوبډلې په اتلولۍ پای ته ورسېدې.
د اتفاق، شروقل، کاکری، استقلال، عقابان، نورک، کوغنی ها او خوال لوبډلو څخه پای لوبه د عقابان او اتفاق لوبډلو ترمنځ ترسره شوه، چې عقابان لوبډلې خپلې سیالې لوبډلې ته ۳/۱ میدانونو په توپیر ماتې ورکړه او اتلولي یې په خپل نوم کړه.
د یادو سیالیو موخه په دغه ولسوالۍ کې د والیبال ورزش ته وده ورکول دي.
د سیالیو په پای کې د بدني روزنې او ورزش امریت له لوري لومړي او دوهم نمبر لوبډلو ته کپونه، مډالونه او سیاینلیکونه ورکړل شول.
