غمان؛ علینګار ولسوالۍ کې د ١٦ لوبډلو ترمنځ د والیبال سیالۍ پای ته ورسېدې
د لغمان ولايت د بدني روزنې او ورزش آمریت اړوند د والیبال فدراسیون د استازولي له لوري د ياد ولايت د علینګار ولسوالۍ په رجه يي کلي کې د ١٦ لوبډلو ترمنځ د والیبال سیالۍ د صدام لوبډلې په اتلولي پای ته ورسېدې.
د یادو سیالیو پایلوبه د حکيم او صدام لوبډلو ترمنځ ترسره شوه، چې په پایله کې یې صدام لوبډلې د ٢ پر صفر میدانونو په توپیر حکيم لوبډلې ته ماتې ورکړه او اتلولي یې په خپل نوم کړه.
دغه سيالۍ د ځوانانو ترمنځ د یووالي په موخه ترسره شوې چې لس ورځې یې دوام وکړ او په پای کې د ياد ولايت د ورزشي آمريت له لوري اتلې لوبډلې ته د اتلولي کپ او غوره لوبغاړو ته مډالونه او ستاینلیکونه ورکړل شول.
