غزني کې د ۱۰ لوبډلو ترمنځ د فوټبال غوره لیګ سیالۍ د اتحاد شامیر لوبډلې په اتلولۍ پای ته ورسېدې
د غزني ولایت د بدني روزنې او ورزش امریت اړوند د فوټبال ملي فدراسیون د استازولۍ له لوري د یاد ولایت له مرکز او ولسوالیو د ۱۰ لوبډلو ترمنځ د فوټبال غوره لیګ سیالۍ، چې ۴۵ ورځې مخکې پيل شوې وې د اتحاد شامیر لوبډلې په اتلولۍ پای ته ورسېدې.
د دغو سیالیو په پایلوبه کې اتحاد شامیر لوبډلې خپلې سیالې پیروزي لوبډلې ته د ۲/۱ ګولونو په توپير ماتې ورکړه او اتلولي یې خپله کړه.
د دغو سیالیو د پای په مراسمو کې د المپيک، بدني روزنې او ورزش عمومي رئیس مولوي احمد الله وثیق، د ا.ا.ا. ویاند مرستیال حمد الله فطرت او د غزني ولایت د بدني روزنې او ورزش امر فرید احمد سید خېل ګډون کړی وو.
د یادو سیالیو موخه د ۱۴۰۴ کال غوره لوبډله موندل و؛ د سیالیو په پای کې غوره لوبډلې او لوبغاړو ته چمتو شوې ډالۍ ورکړل شوې.
