غزني؛ گيرو ولسوالۍ کې د ۱۵ لوبډلو تر منځ د ټېپ بال کرکټ سيالۍ پیل شوې
د غزني ولايت د بدني روزنې او سپورټ آمريت اړوند، د ټېپ بال فدراسيون د استازولۍ له لورې، د ياد ولايت په گيرو ولسوالۍ مټا خان کلي کې د ۱۵ لوبډلو ترمنځ د ټېپ بال کرکټ سيالۍ پيل شوې.
د يادو سياليو لومړۍ لوبه د مټا خان ځوانانو او بابکر اتلانو ترمنځ ترسره شوه، د لوبې پچه مټا خان لوبډلې وگټله او سيالې لوبډلې ته يې د توپ وهنې بلنه ورکړه، بابکر اتلانو لوبډلې په ټاکلو ۱۲ اورونو کې د نهو لوبغاړو په سوځېدو سره د ۱۹۱ منډو هدف کېښود، مټا خان لوبډلې ياد هدف د ۸ لوبغاړو په سوځېدو سره پوره کړ او بريا يې په خپل نوم کړه.
دغه سيالۍ، چې ۲۱ ورځې به دوام وکړي، موخه يې د ځوانانو تر منځ يووالی او د نشه يي توکو پر وړاندې مبارزه ياده شوې ده.
