غزني؛ بزي ايلوان سټارز لوبډلې د آب بند ولسوالۍ د ټېب بال کرکټ سياليو اتلولي وگټله
د غزني ولايت د بدني روزنې او سپورټ آمريت اړوند د ټېب بال فدراسيون د استازولۍ له لوري د آب بند ولسوالۍ په بزي کلي کې د ۱۷ لوبډلو تر منځ د ټېب بال کرکټ سيالۍ د بزي ايلوان سټارز لوبډلې په اتلولۍ پای ته ورسېدې.
د يادو سياليو پايلوبه د بزي ايلوان سټارز او رحمان کلا اتلانو لوبډلو تر منځ ترسره شوه، چې په پايله کې بزي ايلوان سټارز لوبډلې په ټاکلو لسو اورونو کې سيالې لوبډلې ته ۱۲۰ منډې هدف کېښود، رحمان کلا اتلانو لوبډلې ياد هدف تر لاسه نه کړ او د ۴۵ منډو په توپير یې بزي ايلوان سټارز لوبډلې ته ماتې ومنله.
دغه سيالۍ چې شاوخوا ۲۱ ورځې یې دوام وکړ، موخه يې د ځوانانو تر منځ يووالی او د نشه يي توکو پر وړاندې مبارزه ياده شوې ده.
په پای کې گټونکې لوبډلې ته د اتلولۍ جام او غوره لوبغاړو ته چمتو شوې ډالۍ ورکړل شوې.
