سه شنبه، د چنگاښ پنځمه، ۱۴۰۳
د ميدان وردگ ولايت د بدني روزنې او سپورټ امريت له لوري د ياد ولايت په سيدآباد ولسوالۍ کې د ۷۰ لوبډلو ترمنځ د ځوانانو يووالي په موخه د ټېپ بال کرکټ سيالۍ د لوړې ښامارانو لوبډلې په اتلولۍ پای ته ورسېدې.
د يادو سياليو پايلوبه د لوړې ښامارانو او شش قلعه لوبډلو ترمنځ ترسره شوه، شش قلعه لوبډلې د لوبې پچې په گټلو سره په ټاکلو اتو اورونو کې سيالې لوبډلې ته د ۱۳۲ منډو هدف کېښود، لوړې ښامارانو لوبډلې ياد هدف په وروستي اور کې ترلاسه کړ او د اوو ويکټو په توپير يې بريا خپله کړه.
دغه سیالۍ، چې اته ورځې يې دوام وکړ، په پای کې لومړي او دويم مقام گټونکو لوبډلو ته کپونه، ستاينليکونه او چمتو شوې ډالۍ ورکړل شوې.
