سرپل کې د ۶۵ چاپ اندازانو ترمنځ د وزلوبې سيالۍ پيل شوې
د المپیک، بدني روزنې او ورزش ریاست اړوند د وزلوبې ملي فدراسیون له لوري د سرپل ولایت مرکز کې د ۶۵ چاپ اندازانو ترمنځ د وزلوبې سيالۍ پیل شوې.
د دغو سیالیو د پیل په مراسمو کې د المپیک، بدني روزنې او ورزش ریاست عمومي ريیس مولوي احمدالله وثیق، د ياد رياست فني او مسلکي مرستیال حافظ احمد جان ځدراڼ، ورزشي ارشد سلاکار قاري حیات الله رحماني، د وزلوبې فدراسیون ريیس غلام سرور جلال، قومي مشرانو، ورزشکارانو او د وزلوبې زرګونو مینوالو ګډون کړی و.
د دغو سياليو په لومړۍ ورځ د ميدان د حکم له لوري دوه اخراولاقونه اعلان شول، چې لومړی اخراولاق نجیب الله پهلوان د حلال تر دايرې ورساوه او د ۵۰۰ امریکايي ډالرو ګټونکی شو او دویم آخراولاق بیا صفت الله پهلوان ترسره کړ او د ٣٠زره افغانيو او یو اوښ ګټونکی شو.
باید یادونه وکړو، چې دا سیالۍ د ملي سوداګر حاجي متين بای د زوی د واده د مراسمو په موخه پیل شوي دي، چې دوې ورځې به دوام وکړي.
