سرپل کې د اتو لوبډلو ترمنځ د فوټسال سیالۍ د ولیعصر لوبډلې په اتلولۍ پای ته ورسېدې
د سرپل ولایت د بدني روزنې او ورزش امریت اړوند د فوټبال فدراسیون د استازولۍ له لوري د یاد ولایت په مرکز کې د وحدت جام په نوم د فوټسال سیالۍ، چې ۲۰ ورځې مخکې پیل شوې د ولیعصر لوبډلې په اتلولۍ پای ته ورسېدې.
د دغو سیالیو په پایلوبه کې ولیعصر لوبډلې خپلې سیالې شاهین لوبډلې ته د ۱/۰ ګول په توپير ماتې ورکړه او اتلولي یې خپله کړه.
هېره دې نه وي د سیالیو په پای کې د معراج له کلب څخه محمد جلالي غوره لوبغاړی، له ولیعصر لوبډلې څخه حسن سروري غوره ګول ساتونکی او له یاران پناهي لوبډلې څخه صادق پناهي د زیاتو ګولونو وهونکی لوبغاړی وټاکل شو.
د یادو سیالیو موخه د فوټسال ورزش ته وده ورکول و، د سیالیو په پای کې غوره لوبډلې ته د اتلولۍ جام او غوره ورزشکارانو ته چمتو شوې ډالۍ ورکړل شوې.
