سرپل؛ سانچارک ولسوالۍ کې د ۱۲ لوبډلو ترمنځ د فوټبال سیالۍ د نوین تبر لوبډلې په اتلولۍ پای ته ورسېدې
د سرپل ولایت د بدني روزنې او ورزش امریت اړوند د فوټبال فدراسیون د استازولۍ له لوري د سانچارک ولسوالۍ په ورزشي لوبغالي کې د پسرلني جام په نوم د فوټبال سیالۍ، چې یوه نیمه میاشت وړاندې پیل شوې وې د نوین تبر لوبډلې په اتلولۍ پای ته ورسېدې.
د دغو سیالیو پایلوبه کې د نوین تبر لوبډلې خپلې سیالې سانچارک امنیه قومندانۍ لوبډلې ته د ۱/۰ ګولونو په توپیر ماتې ورکړه او اتلولي یې خپله کړه.
د یادو سیالیو موخه فوټبال ورزش ته وده ورکول او د سانچارک ولسوالۍ منتخبې لوبډلې ته د غوره لوبغاړو موندل و.
د سیالیو په پای کې د ورزش امریت له لوري غوره لوبډلې ته د اتلولۍ جام او غوره لوبغاړو ته چمتو شوې جایزې ورکړل شوې.
