زابل کې د ۲۸ ورزشکارانو ترمنځ د ووشو سيالۍ وشوې
د زابل ولايت د بدني روزنې او ورزش آمريت اړوند د ووشو فدراسيون د استازولۍ له لوري د ياد ولايت په مرکز قلات ښار کې د دوو کلبونو د ۲۸ ورزشکارانو ترمنځ ورزش ته د ځوانانو هڅولو په موخه د ووشو سيالۍ وشوې.
يادې سيالۍ، چې د عتیق الله او ارشاد کلبونو ورزشکارانو ترمنځ ترسره شوې، په پايله کې د عتیق الله کلب ورزشکارانو په بريا پای ته ورسېدې.
د ويلو وړ ده، چې دغو سیالیو دوې ورځې دوام وکړ او په پای کې غوره ورزشکارانو ته مډالونه او ستاينليکونه ورکړل شول.
