زابل؛ په نوبهار ولسوالۍ کې د ۱۸ لوبډلو ترمنځ د ټېپ بال کرکټ سيالۍ پای ته ورسېدې
د زابل ولايت په نوبهار ولسوالۍ کې د لوی اختر په مناسبت د ۱۸ لوبډلو ترمنځ د ټېپ بال کرکټ اختريزې سيالۍ د سينزايي لوبډلې په بريا پای ته ورسېدې.
د دغو سياليو پايلوبې ته سينزايي او شهاب الدين لوبډلو لار موندلې وه، په پيل کې شهاب الدين لوبډلې توپ وهنه وکړه او په ټاکلو ۱۲ اورونو کې يې خپلې سيالې سينزايي لوبډلې ته د ټولو لوبغاړو په زيان ۸۴ منډې هدف کېښود، بل لوري ته سينزايي لوبډلې د لوبې په شپږم اور کې ياد هدف د دوو لوبغاړو په سوځېدو پوره کړ او اتلولي يې خپله کړه.
د يادونې وړ ده چې نوموړې سيالۍ د زابل ولايت د ورزشي امريت او نوبهار ولسوالۍ د ورزشکارانو او قومي مشرانو په همغږۍ ترسره شوې.
