زابل؛ غزنويانو لوبډلې د قلات ښار د فوټسال سياليو اتلولي وگټله
د زابل ولايت د بدني روزنې او سپورټ امريت اړوند د فوټبال فدراسیون د استازولۍ له لوري د قلات ښار په ورزشي جمنازيوم کې د شپږو لوبډلو ترمنځ د يووالي په نوم د فوټسال سيالۍ د غزنويانو لوبډلې په اتلولۍ پای ته ورسېدې.
په دغو سیالیو کې د استقلال، غزنويان، ترنک، استقلال ب، غزنويان ب او ترنک ب لوبډلو گډون کړی وو.
د يادو سياليو پايلوبه د غزنويانو او استقلال لوبډلو ترمنځ ترسره شوه، چې په پايله کې غزنويانو لوبډلې خپلې سيالې لوبډلې ته ۳/۵ گولونو په توپير ماتې ورکړه او اتلولي يې خپله کړه.
د دغو سياليو موخه د ځوانانو ترمنځ يووالی او د فوټسال لوبې وده ياده شوی وه، چې يوه اوونۍ يې دوام وکړ او په پای کې د یاد ولایت د ورزش امريت له لوري غوره ورزشکارانو ته ستاينليکونه ورکړل شول.
