د کابل مرکزي زون د ۲۲۱ ورزشکارانو ترمنځ د فټنس او د بدن ښکلا اتلسم پړاو ټاکنیزې سیالۍ پيل شوې
د المپیک، بدني روزنې او ورزش عمومي ریاست اړوند د فټنس او بدن ښکلا ملي فدراسیون له لوري د کابل ښار د مرکزي زون له ۳۷ کلبونو د ۲۲۱ ورزشکارانو ترمنځ د فټنس او بدن ښکلا اتلسم پړاو ټاکنیزې سیالۍ پيل شوې، چې یوه ورځ به دوام وکړي.
دغه سیالۍ به په ۱۰ بېلا بېلو وزني کټګوریو او په سپورت فیزیک، اتلتیک فیزیک او بدن ښکلا سبکونو کې ترسره شي، چې په پایله کې به ۱۲۰ تنه ورزشکاران د کابل ښار مرکزي زون منتخبې لوبډلې ته وټاکل شي.
د دغو سیالیو د پيل مراسمو کې د المپيک، بدني روزنې او ورزش عمومي ریاست فني او مسلکي مرستیال حافظ احمد جان ځدراڼ، د یاد ریاست ورزشي مشاور قاري حیات الله رحماني، د ورزش ادارې حقوقي مشاور انجینر سید رسول افغاني، د المپيکي چارو رئیس داد محمد پاینده اختري، د ورزش ادارې د دعوت او ارشاد رئیس داد محمد بریال عطایي، د فټنس او د بدن ښکلا فدراسیون رئیس، د یاد ورزش ورزشکارانو او د ورزش مینوالو ګډون کړی وو.
د یادو سیالیو موخه د کابل ښار مرکزي زون منتخبې لوبډلې ته د غوره ورزشکارانو موندل او د فټنس او بدن ښکلا ورزش ته وده ورکول دي.
