د کابل لویدیځ زون د ۱۰۰ پهلوانانو ترمنځ د پهلوانۍ ټاکنیزې سیالۍ پيل شوې
د المپیک، بدني روزنې او ورزش عمومي ریاست اړوند د پهلوانۍ ملي فدراسیون له لوري د یاد ریاست په ۲۵۰۰ کسیز جمنازیوم کې د کابل لویدیځ زون د ۱۰۰ پهلوانانو ترمنځ د ځوانانو او لویو ورزشکارانو په عمري کټګوریو او لسو کلاسونو کې د پهلوانۍ ټاکنیزې سیالۍ پيل شوې.
دغه سیالۍ، چې درې ورځې به دوام وکړي، په پایله کې به یې له هر کلاس څلور تنه او د کټګوریو په برخه کې د ځوانانو له کټګورۍ ۴۰ تنه او د لویو ورزشکارانو له کټګورۍ ۴۰ تنه پهلوانان، چې ټول ۸۰ تنه پهلوانان کېږي د کابل پهلوانۍ سیالیو او لویدیځ زون منتخبې لوبډلې ته وټاکل شي.
هېره دې نه وي، چې راتلونکي کې به هم دې ته ورته د نورو زونونو ترمنځ سیالۍ ترسره شي او موخه یې د کابل پهلوانۍ سیالیو او لویدیځ زون منتخبې لوبډلې ته د غوره لوبغاړو موندل دي.
