د کابل سنوکر لیګ سیالۍ په نخبګان کلب کې پیل شوې
د کابل سنوکر لیګ سیالۍ د کابل ولایت د مختلفو کلبونو د سلو ورزشکارانو ترمنځ په شهرنو کې د شپږ ورځو لپاره پیل شوې.
د دې سیالیو د پیل په مراسمو کې ګلاب الدین خپلواک د بدني روزنې او سپورټ عمومي ریاست ارشد مشاور، الله محمد اتل مشواڼي د المپیک ملي کمېټې او سپورټ عمومي ریاست د نشراتو رئیس او ویاند، قدرت الله زرمتي د خارجه اړیکو مسول، د سنوکر کلب مسولینو ګډون کړی و.
د یادو سیالیو د پیل په مراسمو کې اتل مشواڼي خبرې وکړې، نوموړي د سنوکر د دغو سیالیو په پیلېدو خوښي وښوده، زیاته یې کړه، چې د ورزش ادارې رهبري او مشرتابه په دې هڅه کې دی، چې بهرنۍ ورزشي اړیکې لا پیاوړې کړي؛ ترڅو ورزشکاران په بهرنیو سیالیو کې ډېر ګډون وکړي او هیواد ته ویاړونه راوړي.
همدا راز یې له موجودو ورزشکارانو وغوښتل، چې د لوبو پر مهال ورزشي اخلاقو او اسلامي اصولو ته بشپړه پاملرنه وکړي.
یادې سیالۍ په دوو پړاونو کې ترسره کیږي، چې لومړی پړاو یې د لیګ په بڼه او دویم هغه به یې په حذفي ډول ترسره شي.
د دې سیالیو موخه د کابل ولایت د سنوکر د غوره څېرو موندل دي، چې د یاد ولایت په نماینده ګي به په ولایتي لوبو کې ګډون وکړي.
