د چارو ادارې عمومي ریاست د فوټسال رمضان جام سیالیو اتلولي د مالي چارو ریاست لوبډلې خپله کړه
د بدني روزنې او ورزش عمومي رياست اړوند په ۵۰۰ کسيز جمنازيوم کې د افغان بيسيم مخابراتي شرکت په مالي ملاتړ د چارو ادارې عمومي ریاست له لوري د فوټسال رمضام جام سياليو اتلولي د یادې ادارې د مالي ریاست لوبډلې خپله کړه.
د دغو سیالیو په پایلوبه کې د بدني روزنې او ورزش عمومي ریاست فني او مسلکي مرستیال حافظ احمد جان ځدران، د چارو ادارې د دفتر رئیس مولوي محمد حنان حقاني، د یادو ادارو رئیسانو، ورزشکارانو او کارمندانو ګډون کړی و.
د دغو سیالیو پایلوبې ته د چارو ادارې د مالي ریاست او د اداري فساد پر وړاندې د مبارزې ریاست لوبډلو لار موندلې وه، چې په پایله کې د مالي ریاست لوبډلې خپلې سیالې لوبډلې ته د ۶-۴ ګولونو په توپیر ماتې ورکړه او اتلولي یې خپله کړه.
دغه سیالۍ د روژې میاشتې په لومړیو کې پیل او نن پای ته ورسېدې.
هېره دې نه وي چې په پای کې د دواړو ادارو د مسوولینو له لوري غوره لوبډلو، لوبغاړو، لوبڅارانو ته کپونه، مډالونه، ستاینلیکونه او نقدي ډالۍ ورکړل شوې.
