د يما پطرول افغانستان وزلوبې اووم پړاو ليگ په شپږمه ورځ درې سيالۍ وشوې
د المپيک، بدني روزنې او ورزش عمومي رياست په همکارۍ، د وزلوبې، نيزه وهنې او سيمه ييزو لوبو ملي فدراسیون له لوري د کابل ښار په يکه توت لوبغالي کې د ۱۱ لوبډلو ترمنځ د يما پطرول افغانستان اووم پړاو ليگ سياليو شپږمه ورځ د بغلان، کندز او بدخشان لوبډلو په برياوو پای ته ورسېده.
د وزلوبې اووم پړاو ليگ سياليو په څوارلسمه لوبه کې بغلان لوبډلې سيالې بلخ لوبډلې ته د ۹ پر ۲ امتيازونو په توپير، پنځلسمه سيالي کې کندز لوبډلې سيالې پنجشېر لوبډلې ته د ۹ پر ۳ امتيازونو په توپير او په شپاړلسمه لوبه کې بيا بدخشان لوبډلې خپلې سيالې هرات لوبډلې ته د ۲۰ پر ۳ امتيازونو په توپير ستره ماتې ورکړه او برياوې يې خپلې کړې.
د دغه ليگ اتو غوره لوبډلو پړاو د کندز، بلخ، هرات، بغلان، پنجشېر، بدخشان، سرپل او تخار لوبډلو ترمنځ ترسره کېږي، چې سبا ورځ به هم درې مهمې سيالۍ وشي.
د ويلو ده، چې د يما پطرول افغانستان وزلوبې اووم پړاو ليگ د بهرنيو چاپندازانو په گډون د کندز، فارياب، بلخ، بدخشان، تخار، باميان، سرپل، پنجشير، سمنگان، بغلان او هرات لوبډلو ترمنځ شپږ ورځې مخکې پيل شوي او څلور ورځې به نور هم دوام ومومي.
