د ورزش ادارې عمومي رئیس مولوي احمد الله وثیق د هرات د مخکښ پهلوان عبدالفتاح د مور فاتحه ترسره کړه
د المپیک، بدني روزنې او ورزش عمومي رئیس مولوي احمدالله وثیق او ورسره مله پلاوي او د والیبال ملي فدراسیون رئیس سیدرحیم سادت د هرات ولایت د مشهور او مخکښ پهلوان عبدالفتاح پهلوان زاده د مور د مړینې له کبله نوموړي ته تسلیت ووایه او فاتحه یې ترسره کړه.
دغه تسلیت او فاتحه د ښاغلي پهلوان زاده په کور کې ترسره شوه، چې ترڅنګ یې ښاغلي وثیق د پهلوان زاده تېرې لاسته راوړنې وستایلې او د ورزش په برخه کې خدمتونه د قدر وړ وبلل.
د یادونې وړ ده، چې ښاغلی عبدالفتاح پهلوان زاده په هرات ولایت کې د پهلوانۍ مخکښ او پیاوړی ورزشکار پاتې شوی دی، چې له نړیوالو سیالیو او کور دننه مسابقاتو ډېرې لاسته راوړنې لري.
