د ورزش ادارې عمومي رئیس مولوي احمدالله وثیق د عزیزي شرکت له مشر میرویس عزیزي سره وکتل
د المپیک، بدني روزنې او ورزش عمومي رئیس مولوي احمدالله وثیق له ملي پانګوال او د عزیزي شرکت له مشر میرویس عزیزي سره وکتل.
د دې لیدنې پر مهال، ښاغلي عزیزي د هیواد وروستۍ ورزشي لاسته راوړنې او پرمختګونه وستایل، په وینا یې وروستیو ورزشي پرمختګونو ته په کتو، هیله من دی، چې افغانستان به په نږدې راتلونکې کې پر نړیواله سطحه مختلفې ورزشي لوبډلې ولري.
مولوي احمدالله وثیق د ورزش په پرمختګ کې د ملي پانګوالو، تجارانو او خصوصي سکتور ملاتړ اړین وباله او له ښاغلي عزیزي څخه یې مننه وکړه، چې د هیواد د ورزش حمایت کوي.
ښاغلي عزیزي هم خپله ځانګړې علاقه له ورزش سره وښوده، د ورزش ادارې عمومي رئیس ته یې ډاډ ورکړ، چې په نږدې راتلونکې کې به د ورزشي لوبډلو مالي ملاتړ او د ورزشي اماکنو جوړولو په برخه کې همکاري څرګنده کړي.
