د والیبال ملي لوبډله د والیبال په نړیواله درجه بندۍ کې ۱۵ درجې پورته تللې
د والیبال د نړیوال فدراسیون له لوري د آسیا د والیبال له سیالیو وروسته، د ترسره شوې تازه نظرپوښتنې له مخې د افغانستان د والیبال ملي لوبډله د نړۍ په کچه له ۷۹ مقام څخه ۱۵ درجې پورته تللې او ۶۴ ام ځای یې نیولی.
افغان ملي لوبډلې د آسیا په کچه له ۳۷ ام ځای څخه پنځلسم ځای ته پرمختګ کړی.
د والیبال نړیوال فدراسیون د افغان لوبډلې د پرمختګ لامل په بېلابېلو سیالیو کې ګډون، د والیبال لیګ ترسره کول او له نړیوال فدراسیون او اسیا کنفدراسیون سره ښه همغږي بولي.
په دې نظرپوښتنه کې د جاپان لوبډله په اسیا کې لومړی او په نړۍ کې پنځم ځای خپل کړی، د ایران لوبډلې بیا په اسیا کې دویم او په نړۍ کې لسم ځای خپل کړی دی.
