د هېواد د رزمي ورزشونو لوبډله په اوسپورټ نړيوالو سياليو کې له دويم مقام ګټلو وروسته هېواد ته راستنه شوه
د افغانستان د رزمي ورزشونو د اوسپورټ سبک لوبډله د ايران هېواد په کوربتوب د رزمي ورزشونو اوسپورټ سبک نړيوالو سياليو کې له ۲۷ مډالونو او دويم مقام ګټلو وروسته نن هېواد ته راستنه شوه، چې د المپيک، بدني روزنې او سپورټ عمومي ریاست د مسولينو، ورزشکارانو او د ورزش مينوالو له لوري يې تود هرکلی وشو.
د يادې لوبډلې د ښه راغلاست په مراسمو کې د المپيک، بدني روزنې او سپورټ عمومي رياست د نشراتو او عامه پوهاوي رييس اتل مشواڼي، د رزمي ورزشونو ملي فدراسيون رييس محمد يوسف مومند، ورزشکارانو او د ورزش ګڼ شمېر مينوالو ګډون کړی و.
د رزمي ورزشونو يادې نړيوالې سیالۍ د " ۲۰۲۵ بشردوستۍ نړیوالو سیاليو " په نوم د ایران هېواد په کرمانشاه ښار کې د رزمي ورزشونو د اوسپورټ په بېلابېلو بڼو کې ترسره شوې، چې افغانستان پکې د ۲۷ مډالونو ( ۶ د سروزرو، ۹ د سپينو او ۱۲ د برنزو ) په ګټلو سره دويم مقام وګاټه.
د یادونې وړ ده، چې په دغو سیالیو کې د افغانستان په ګډون د ۱۲ هېوادونو ورزشکارانو ګډون کړی و، چې د فبروري پر ۱۱مه پيل او د همدې مياشتې پر ۱۵مه نېټه د ايران په لومړي مقام، د افغانستان پر دويم مقام او د عراق په درېيم مقام ګټلو پای ته ورسېدې.
