د هېواد د بدن ښکلا ملي لوبډلې لوبغاړي علي رضا اساهي د بدن ښکلا په نړيوالو سياليو کې د سرو زرو لومړنى مډال ترلاسه کړ
د هېواد د بدن ښکلا ملي لوبډلې لوبغاړي علي رضا اساهي د بدن ښکلا په څلورم پړاو نړيوالو سياليو کې چې د جنوبي کوریا ګانګواک ايالت په ونجو ښار کې ترسره شوې د افغانستان لپاره د سرو زرو لومړنى مډال ترلاسه کړ .
٥٠کلن اساهي په +٨٠ کيلو ګرام وزن کې چين، جاپان، هندوستان او جنوبي کوریا ته ماتې ورکړه او د افغانستان لپاره يې د بدن ښکلا له نړيوالو سياليو څخه د سرو زرو لومړنى مډال ترلاسه کړ.
ټاکل شوې سبا جمعه به د هېواد د بدن ښکلا ملي لوبډلې بل لوبغاړى زلمى شکوري د سپورت فزيک برخه کې په ١٧٥ سانتي متر قد کې له خپل سیال سره د لوبې ډګر ته ښکته شي، همداراز د شنبې په ورځ به محمدايوب اعظمي هم په ١٠٠ کيلو وزن او علي رضا اساهي يو ځل بيا په ٩٠ کيلو ګرام وزن کې د لوبې ډګر ته ښکته شي.
د يادولو ده چې د جنوبي کوریا په کوربتوب د بدن ښکلا او فټنس نړيوالي سيالۍ د ٤٠ هېوادونو ورزشکارانو په ګډون دوام لري.
په دغو سياليو کې علي رضا اساهي، زلمي شکوري او محمدايوب اعظمي د افغانستان استازیتوب کوي.
