د فوټبال تر ۱۷ کلنو کم عمره ملي لوبډله په کافا سیالیو کې له درېیم مقام ګټلو وروسته هېواد ته راستنه شوه
د هیواد د فوټبال تر ۱۷کلنو کم عمره ملي لوبډله د مرکزي اسیا اتلولۍ ( کافا) سیالیو کې د برنزو له مډال او درېیم مقام ګټلو وروسته نن څلور بجې هېواد ته راستنه شوه.
یادې لوبډلې په خپله لومړۍ سیالي کې قرغیزستان هېواد ته د " ۳-۰" ګولونو په توپیر ماتې ورکړه، په دویمه هغه کې یې له تاجکستان څخه د " ۱-۳" ګولونو په توپیر ماتې وخوړه او په درېيمه لوبه کې یې ایران ته د "۱-۲ " ګولونو په توپیر ماتې ورکړه او په دې سره یې په کافا سیالیو کې درېیم مقام وګاټه.
د لوبډلې د ښه راغلاست په مراسمو کې د فوټبال فدراسیون ویاند او په کافا سیالیو کې د برخه وال پلاوي غړي هاشمي وویل:
" لوبغاړو په خورا لوړ مورال لوبه وکړه، د افغانستان لپاره په کافا سیالیو کې دومره پیاوړیو لوبډلو ته ماتې ورکول او درېیم مقام ګټل تاریخ ساز او د افغانستان د فوټبال د راتلونکي لپاره هیله او ښه زېری دی. "
د آسیا مرکز اتلولۍ یا کافا سیالۍ د آګسټ میاشتې په ۲۰ مه د تاجکستان هېواد په کوربتوب پیل او تر ۲۷ مې نېټې یې دوام وکړ.
په دې سیالیو کې افغانستان، قرغيزستان، تاجکستان، ازبکستان او ایران برخه اخیستې وه.
