د خوست تڼیو ولسوالۍ کې لوی ورزشي جشن ترسره شو

د خوست ولایت ورزشي امریت په لارښوونه د تڼیو ولسوالۍ د ځوانانو لخوا د جمعې په ورځ لوی ورزشي جشن ترسره شو.
په دې ورزشي جشن کې د خوست ورزشي امریت مسوولینو، دګڼو ادارو رئیسانو ، د تڼیو ولسوالۍ ملکي اونظامي چارواکو، قومي مشرانو ، فعالو ورزشي ځوانانو ، ورزشکارانو او د ورزش ګڼو مینه والو برخه اخیستې وه.
د خوست ورزشي امر عطاء الله کډوال دې ورزشي مراسمو ته د خبرو پر مهال د سیمې له امنیتي مسؤولینو او فعالو ځوانانو څخه مننه وکړه چې د دې جشن په برابرولو کې له ورزشي امریت سره یوځای لاس په کار شول.
دا ورزشي جشن د کبډي سیالیو په ترسره کولو پیل شو، چې د سیمې (۷) لوبډلې پکې برخه اخېستې ده.
دا ټورنمینټ به دوه اونۍ دوام وکړي او هر مازیګر به یوه یوه لوبه ترسره شي.
د کبډي فدراسیون مسؤل صفي الله امرخېل وایې، چې له دې وروسته به په هره ولسوالۍ کې ورته ټورنمینټونه په لاره اچوي تر څو ترې غوره لوبغاړي د لویانو ، ځوانانو او نویو ځوانانو منتخبو لوبډلو ته وټاکل شي.