د بدخشان ولایت د وزلوبې فدراسیون لپاره نوی مسؤل وټاکل شو
د المپیک، بدني روزنې او ورزش عمومي ریاست له لوري د پهلوان زبیر قيومي پر ځای الحاج ملا حیدر حیدر د بدخشان ولایت د وزلوبې فدراسیون نوی مسؤل وټاکل شو.
د هېواد د ورزش ادارې رهبري او ورسره مله پلاوي د روان هجري شمسي کال د غويي میاشتې په ١٨مه نېټه د ورزشي وضعیت د ارزونې په موخه د هېواد شمالي ولایتونو ته د سفر په ترڅ کې بدخشان ته سفر وکړ او د ياد ولايت د وزلوبې فدراسیون له استازي، چاپ اندازانو او آس لرونکو سره یې ولیدل.
په دغې لیدنه کې د بدخشان د وزلوبې فدراسیون له استازو او چاپ اندازانو سره د وزلوبې د لا ښې ودې او پرمختګ او د ممکنه خنډونو د مخنیوي او حللارو په اړه خبرې وشوې.
د دغه سفر له پای ته رسېدو وروسته د غويي میاشتې په ٢٥مه نېټه الحاج ملا حیدر حیدر د ياد ولايت د وزلوبې فدراسیون لپاره نوی مسؤل وټاکل شو.
د بدني روزنې او ورزش عمومي رئیس مولوي احمدالله وثیق د بدخشان ولایت د وزلوبې د فدراسیون پخواني مسؤل د پهلوان زبیر قيومي هڅې وستایلې او زیاته یې کړه، چې د نوموړي د خدمت په موده کې د بدخشان وزلوبې د پام وړ پرمختګ کړی دی.
ښاغلي وثیق همداراز له زبیر قيومي څخه مننه وکړه، چې په خپل وخت کې یې د خپل ولایت د وزلوبې د پرمختګ لپاره نه ستړې کېدونکې هلې ـ ځلې کړې دي.
