د المپيک ملي کمېټې او سپورټ عمومي رياست رئيس الحاج مولوي عبدالودو حقاني په کابل کې د مرحوم رغبت په نوم د بوکسينګ له سياليو څخه ليدنه وکړه
د المپيک ملي کمېټې او سپورټ عمومي رياست رئيس الحاج مولوي عبدالودود حقاني، د بدني روزنې او ورزش عمومي ریاست د بوکسينګ ملي فدراسیون په تمريناتي ځای کې، د مرحوم عبدالغفور رغبت په نوم د بوکسينګ له دېرشم پړاو سياليو څخه ليدنه وکړه.
له ښاغلي حقاني سره په دې ليدنه کې د المپیک ملي کمېټې اجرائیه رئیس داد محمد پاينده اختري، د فدراسيونونو امر محمد اعظم کوهي، د سياليو دايرولو امر عزيز الرحمن ملنګ، د ميدان وردګ ولايت ورزشي امر ذبیح الله وهاج او د سوکوهنې فدراسیون مسوولينو هم ملتيا کوله.
د المپيک ملي کمېټې او سپورټ عمومي رئيس مولوي عبدالودود حقاني د سوک وهنې سياليو کې ګډونوالو ته په خپله وينا کې خوښي وښوده، چې له شل کلنې جګړې وروسته د سولې او امنيت په فضا کې سيالۍ ترسره کيږي.
ښاغلي حقاني ورزش يوه جامع کلمه وبلله چې په ورزشکارانو متحمل ده.
نوموړي ورزشکاران د کليو ، ښارونو، ولايتونو او هېوادونو ترمنځ ارتباطي پول ياد کړل په خبره يې؛ همدا ورزشکاران دي چې له هېواده بهر په ورزشي سياليو کې ګډون کوي او د افغانستان په استازیتوب له نړۍ سره د هېواد ارتباطي پول رامنځته کوي.
ښاغلي حقاني په خپلو خبرو کې يو ځل بيا له ورزشکارانو سره د خپل توان او اقتصاد مطابق د ملاتړ او امکاناتو د برابرولو ډاډ ورکړ او په دې برخه کې يې د پياوړې ارادې هوډ څرګند کړ.
د مرحوم عبدالغفور رغبت په نوم د بوکسينګ دېرشم پړاو سيالۍ دوه ورځې وړاندې د بدني روزنې او ورزش عمومي رياست د سوک وهنې ملي فدراسیون په تمريناتي ځای کې د ٢٢ کلبونو د "١١-١٢ کلنو او ١٤-١٦کلنو" دوو سني کټګوريو ١٣٠ تنو ورزشکارانو ترمنځ پيل شوې.
په دې سیالیو کې ګډون کوونکي ورزشکاران له ۳۵ کیلو تر ۷۰ کیلو پورې په ۱۴ وزنونو کې د یو بل په وړاندې سیالۍ کوي.
د دغو سیالیو موخه د ارواښاد عبدالغفور رغبت یاد او د بوکسنګ د تنکیو ورزشکارانو وړتیاوو ته وده ورکول دي.
دغه سیالۍ هر کال د کابل ښار د کلبونو ترمنځ د ارواښاد عبدالغفور رغبت د بوکسرانو ټولنې له لوري د افغانستان د بوکسېنګ فدراسیون په همکارۍ ترسره کیږي.
